НАҚШАИ ГЕНЕРАЛИИ ШАҲР ТАРТИБ ДОДА ШУД

Хуҷанд,  13 апрел. (АМИТ «Ховар»,  Санавбар  Мақсудова). —  Раиси   шаҳри  Хуҷанд  Содиқҷон  Мирхолиқов  12  апрел  барои  хабарнигорон  нишасти  матбуотӣ ташкил намуда,   хабар  дод, ки  дар  шаҳри  Хуҷанд  дар  давоми  се  моҳи  аввали  соли  2010  нақшаи  истеҳсоли   маҳсулоти  саноатӣ 109,3   фоиз,  нақшаи  қисми  даромади  буҷети  давлат 137,2  фоиз  ва ҷамъоварии андоз 102,1  фоиз  иҷро карда шуд. Дар  ин  давра  7  корхонаи   саноати  сабуки  шаҳр  661,1  тонна   нахи  пахта  истеҳсол  намуд. Дар  ин  муддат  дар  корхонаҳо 2247  ҷои  нави  кор   муҳайё  гардид. Аз  рӯи  натиҷаҳои  се  моҳи гузаштаи  маблағи миёнаи  моҳона  дар шаҳри  Хуҷанд  419,6  сомониро  ташкил  медиҳад. Қайд карда  шуд, ки  тӯли  се  моҳи  гузашта ба  маблағи 3  миллиону  992  ҳазор  сомонӣ  корҳои  сохтмонӣ  иҷро  шуданд. Ғайр  аз  ин  бо  дастгирии Агентии сохтмон ва  меъмории   ҷумҳурӣ  нақшаи  генералии   шаҳр   тартиб дода шуд. Мувофиқи  нақшаи  генералӣ  минбаъд  маҳалҳои  аҳолинишин   аз  рӯи тартиби  муайян   сохта  мешаванд,  гуфт  С.Мирхолиқов.