НАВИСАНДАИ ТОҶИК – БАРАНДАИ ҶОИЗАИ АДАБИИ РУСИЯ

Душанбе,  13 апрел. (АМИТ «Ховар»). —  12  апрел  дар  Маскав  натиҷаҳои озмуни  панҷуми   адабии  «Русская  премия»  ҷамъбаст  карда  шуд.  Дар озмуни  мазкур   асарҳои беҳтарини   адибоне  муайян  карда шудаанд, ки  дар  мамлакатҳои дигар  кору  зиндагӣ  карда, ба забони русӣ  асар  эҷод  менамоянд. Маросими  супоридани  ҷоизаҳои озмун  дар  «Президент —  отел»  баргузор  гардид. Озмун  дар  бахши  асарҳои  калонҳаҷм,  назм,  асарҳои  ҳаҷман  хурд  ва  адабиёти  бачагона  ҷамъбаст  карда  шуд.  Ҷоизаи  озмун  дар  бахши  асарҳои   нисбатан  хурди  насрӣ  дар  соли  2009 ба  нависандаи  тоҷик  Алишер  Ниёзов  муносиб  дониста  шуд.  Ҳайати  доварони озмун  маҷмӯаи  ҳикояҳои  А.Ниёзов «Фарҳод  ва  Ширин» — ро   ба  ин  ҷоиза  сазовор  донист. Алишер  Ниёзов  дар  байни  нависандагон  бо  тахаллуси  Алексей  Турк машҳур  буда,  айни  ҳол  дар  Қирғизистон  зиндагӣ  мекунад. Дар  озмун  инчунин  асарҳои   адибони  Арманистон Мариам Петросян,  ИМА Мария  Тиматова,  адиби  украин  Алексей  Курилко,  адиби  молдавӣ Олеся  Рудягина  ва  дигарон  сазовори  ҷоиза   гардиданд. Мухбири  АМИТ «Ховар»  хабар  медиҳад,  ки дар  озмуни  мазкур  барои ҷои  аввал  5000  доллари  ИМА, барои  ҷои дуюм  2000 доллари  ИМА ва  барои  ҷои  сеюм 1,5 ҳазор доллари  ИМА  мукофот  дода  мешавад.