НИШАСТИ МАТБУОТИИ ПРОКУРОРИ ВИЛОЯТ

Хуҷанд,  13 апрел. (АМИТ «Ховар»,  Санавбар  Мақсудова). —  Прокурори  вилояти  Суғд   Юсуф  Раҳмонов  12  апрел  дар  ҷараёни  нишасти  матбуотӣ  зикр  намуд, ки  дар  давоми  се  моҳи  аввали  соли  равон  дар  вилоят 866   ҷиноят  ба  қайд  гирифта  шуд.  Ин   нисбат ба  хамин  давраи  соли  2009 – ум  1,8  фоиз   кам  мебошад.  Семоҳаи  аввали  соли  равон фош  намудани  ҷиноятҳо  нисбат ба  ҳамин давраи   соли гузашта 2,5  фоиз  афзуд. Дар  ин  муддат  дар  вилоят  96  ҷинояти   вобаста ба  хариду  фурӯши  ғайриқонунии  маводи нашъадор ба  қайд  гирифта,  75  килограмму  261  грамм   маводи  нашъадор,  аз  ҷумла  38  килограмм  героин  мусодира  карда шуд. Прокурори  вилоят  хабар  дод, ки  тӯли  моҳҳои  гузашта аз  аҳолӣ  120  адад  аслиҳаи оташфишон  мусодира  карда  шуд. Қайд  карда  шуд, ки дар  ин  муддат  54  нафар  худкушӣ  карда,  35  нафари  дигар  ба  ҷони худ  қасд  намуд. Қисми  зиёди  чунин  ҷиноятҳо  фош  карда,  тафтиши  қисми  боқимондаи онҳо  давом  дорад. Ю.Раҳмонов  зикр  кард, ки дар  ин  давра бо  дахолати прокуратура  маблағи  музди  кору  маоши  коргарон  ба  маблағи  1  миллиону 177  ҳазор  сомонӣ  рӯёнида  шуд. Инчунин  дар  натиҷаи   тадбирҳои  андешидаи  прокуратура  4  миллиону  800  ҳазор  сомонӣ  маблағи  пардохтҳои  андозу  гумрук  ҷамъ  оварда,  ба  ҳисоби  буҷет  гузаронида шуд. Вилоят  то 1  марти соли  равон   аз ҳисоби  пардохти  андоз  140  миллиону  100 ҳазор  сомонӣ қарздор  мебошад. Маблағи  қарз  аз  ҳисоби   сари  вақт  надодани  нафақа  5  миллиону  331  ҳазор  сомониро ташкил  медиҳад.