Ҳ. ЗАРИФӢ МУЛОҚОТҲОИ ДУҶОНИБА БАРГУЗОР НАМУД

Душанбе, 20 май. (АМИТ «Ховар», Покиза Маҳмадбекова). — 19 майи соли 2010 дар ҳошияи ҷаласаи 37-уми Шўрои вазирони корҳои хориҷии кишварҳои аъзои Созмони Конфронси Исломӣ Вазири корҳои хориҷии Ҷумҳурии Тоҷикистон, Раиси ҷаласаи 37-уми Шўрои вазирони корҳои хориҷии кишварҳои аъзои Созмони Конфронси Исломӣ Ҳамрохон Зарифӣ бо иддае аз роҳбарони ҳайатҳои иштирокчии ҷаласа мулоқотҳои дуҷониба баргузор намуд. Тавре ба мухбири АМИТ «Ховар» аз Вазорати корҳои хориҷӣ хабар доданад, зимни вохўриҳои Ҳамрохон Зарифӣ бо Вазир дар Дастгоҳи Сарвазири Малайзия Дато Сери Муҳаммад Назрӣ Абдул Азиз, Вазири корҳои хориҷии Салтанати Уммон Юсуф ибни Алавӣ ибни Аблуллоҳ, Вазири корҳои хориҷии Ҷумҳурии Чад Мусо Фақӣ Муҳаммад, Вазири давлатӣ оид ба корҳои хориҷӣ ва ҳамоиши Африқои Ҷумҳурии Гвинея Бакари Фофана, муовини Вазири корҳои хориҷии Филиппин ва муовини Вазири корҳои хориҷии Давлати Фаластин Иброҳим Хурайшӣ масъалаҳои густариши ҳамкориҳо дар доираи Созмони Конфронси Исломӣ ва дигар мавзўъҳои мавриди таваҷҷўҳи ҷонибҳо муҳокима гардиданд.