АЁДАТИ СОБИҚАДОРОНИ ҶАНГУ МЕҲНАТ

Душанбе, 5 май. (АМИТ «Ховар», Бекназари Абӯбакр). — 5 майи соли ҷорӣ дар арафаи таҷлили ҷашни 65 -солагии Иди Ғалаба дар ҷанги Бузурги Ватании солҳои 1941-1945 раиси вилояти Суғд Қоҳир Расулзода иштирокчиёни ин ҷангро аёдат намуд. Нахуст раиси вилоят собиқадори меҳнат, рассоми халқии Ҷумҳурии Тоҷикистон Зулфия Баҳриддиноваро, ки дар ақибгоҳ кор мекард, аёдат намуда, ба ӯ аз номи Президенти Ҷумҳурии Тоҷикистон Эмомалӣ Раҳмон медали ҷашнии «65-солагии Ғалаба дар ҶБВ солҳои 1941-1945» ва маблағи пулиро тақдим намуд. Инчунин, Қ. Расулзода ба иштирокчиёни ҷанги Бузурги Ватанӣ Ашӯрмурод Саидмуродов ва Геннадий Сидоров аз номи Президенти мамлакат медали ҷашнӣ ва маблағи пулиро бахшида ба 65-ум солгарди Иди Ғалаба тақдим намуд. Ҳангоми тақдими медалҳои ҷашнӣ зикр шуд, ки воқеан ҳам хизмату ҷонбозиҳои ин мардони далер ва шуҷоъи Ватан дар ҷанги мудҳиши хонумонсӯзи солҳои 1941-1945 ва дар Ғалабаи халқи шӯравӣ аз болои фашизм арзанда аст.