ДАР КӮЛОБ КӢ ХОНА МЕСОЗАД?

Душанбе,  11 май. (АМИТ «Ховар»). —  Роҳбарони  баъзе  вазорату  идораҳо,  шаҳрҳо ва  ноҳияҳо,  инчунин  тоҷирону  соҳибкорони  ҷумҳурӣ  дирӯз  дар  маҷлиси  Ҳукумати  ҷумҳурӣ  ваъда  доданд, ки  барои  аҳолии  аз  боришҳои  тӯлонӣ  зарардида ва   бесарпаноҳ мондаи  шаҳри  Кӯлоб  ва  ноҳияҳои  дигари  вилояти  Хатлон  хона  месозанд. Аз  ҷумла,  шаҳри  Душанбе  барои  зарардидагон  сад  хона,  вилояти  Суғд  40  хона,  муассисаи «Роҳи оҳани Тоҷикистон» 20  хона,  корхонаи  алюминии  Тоҷикистон  50  хона,  бонкҳои  мамлакат  60  хона,  соҳибкорону тоҷирони ноҳияи Ҳисор  20  хона,  шаҳри  Турсунзода,  ноҳияҳои  Ваҳдат,  Рӯдакӣ, фурӯдгоҳи  байналмилалии  шаҳри Душанбе  ҳар  кадоме  10  хонагӣ  хоҳанд  сохт.  Соҳибкор Зайд  Саидов ваъда  дод, ки  барои  бесарпаноҳон  10  манзили  истиқоматӣ  бунёд  месозад. Дар  сохтани  биноҳо барои  зарардидагон  ширкатҳои телефонии  мобилӣ,  ширкати «Хима»,  ширкати  «Ёқут», ширкати «Мовароуннаҳр»  саҳм  мегузоранд. Роҳбарону  намояндагони  ин  корхонаҳо  ваъда  доданд, ки  барои  зарардидагон  5  хонагӣ  сохта  ба  истифода  медиҳанд. Ширкати  ҳавонавардии «Тоҷик Эйр»,  «Тоҷикматлубот»,  Кумитаи  телевизион  ва радио,  Агентии  назорати  молиявии  давлатӣ  ва  мубориза ба  муқобили  ришвахӯрӣ,  прокуратураи  генералӣ,   ширкати «Сим – Сим»  ва  ғайра  низ  барои   зарардидагон  биноҳои  истиқоматӣ  месозанд.