ИҶРОИ ВАЪДАИ ОБИ ТОЗА ЗЕРИ СУОЛ АСТ

Душанбе, 4 май. (АМИТ «Ховар», Лаззат Диловарзод).- Бино ба иттилои маркази матбуоти корхонаи воҳиди давлатии Хоҷагии манзилию коммуналӣ, бо истифода аз имкониятҳои худ аҳли кормандони корхонаи мазкур дар давоми соли ҷорӣ дар доираи даҳсолаи байналмилалии амалиёти «Об барои ҳаёт» ва «Барномаи беҳтар намудани вазъи  таъминоти аҳолии ҷумҳурӣ бо оби нӯшокӣ барои солҳои 2007 – 2020» аҳолии шаҳрҳо ва маркази ноҳияҳоро ба қадри зарурӣ бо оби тоза таъмин менамод. Ин ваъдаи кормандони КВД хоҷагии манзилию коммуналӣ дар  мавридест, ки дар доираи амалӣ шудани марҳилаи сеюми  лоиҳаи рушди инфраструктураи маҳаллӣ (коммуналӣ), дар семоҳаи аввали соли ҷорӣ бинобар гузаронида нашудани тендери пудратчиён корҳои барқарорсозии системаҳо оғоз нагардидаанд. Бар зами ин тибқи нақша, баҳри татбиқи барнома дар миқёси ҷумҳурӣ 10, 458 ҳазор сомонӣ маблағ бояд  ҷудо мегардид, дар асл бошад аз ҳамаи сарчашмаҳои маблағгузорӣ 1,268 ҳазор сомонӣ  маблағ ҷудо карда шудааст, ки  иҷрои ваъдаи КВД Хоҷагии манзилию коммуналиро баҳри таъмини оби тоза зери суол мегузорад.