РАИСИ ВИЛОЯТ АЗ АФЗОИШИ ҲОДИСАҲОИ ХУДКУШӢ НИГАРОН АСТ

Душанбе, 6 май. (АМИТ «Ховар», Бекназари Абӯбакр). — Дар давоми се моҳи аввали соли равон дар вилояти Суғд 89 нафар даст ба худкушӣ задаанд, ки ин нисбат ба ҳамин давраи соли гузашта 26 адад зиёд мебошад. Раиси вилояти Суғд Қоҳир Расулзода аз афзоиши ҳодисаҳои номатлуб, бахусус худкушӣ изҳори нигаронӣ карда, фаъолияти раёсати маориф, раёсати ҷавонон варзиш ва сайёҳӣ ва кумитаи кор бо занон ва оилаи вилоятро мавриди интиқод қарор дод. Ӯ барои бартараф кардани камбудиҳои ҷойдошта, пурзӯр намудани корҳои фаҳмондадиҳӣ, зиёд намудани чорабиниҳои варзишӣ дар ҷамоатҳои деҳот, шаҳракҳо ва макотиби вилоят супоришҳои мушаххас дод.  Раиси вилоят тавсия намуд, ки дар назди кумитаи кор бо занон ва оилаи вилоят фаъол намудани марказҳои равоншиносӣ, ба таври бояду шояд ба роҳ мондани фаъолияти воситаҳои ахбори омма дар шаҳру навоҳии вилояти Суғд, дар ҷойҳои ҷамъиятӣ барқарор намудани нуқтаҳои радио ва дар маркази рӯҳшиносии вилоятӣ беҳтар намудани вазъи хизматрасонӣ ва беҳдошти вазъ дар ин самт мусоидат хоҳад кард. Аз хадамоти матбуоти раиси вилояти Суғд ба АМИТ «Ховар» иттилоъ доданд, Қ. Расулзода ба масъулин дастур дод, ки ҷиҳати пешгирии ҳодисаҳои худкушӣ ва сӯиқасд ба он, зиёдшавии ҷиноятҳо аз тарафи ноболиғон, дар робита бо мақомоти дахлдор чораҳои амалӣ андешида, бо таъсиси гурӯҳи корӣ сабабҳои сар задани ин амалҳои номатлубро муайян намоянд.