12 МИЛЛИОН $ БАРОИ РУШДИ ШАБАКАИ ОБРАСОНИИ ПОЙТАХТ

Душанбе, 21 июн.(НИАТ «Ховар», Марзия Саидова).- Бонки Ҷаҳонӣ бо назардошти татбиқи мақсадноки лоиҳаи обтаъминкунии шаҳри Душанбе,  омодааст, ки дар асоси Лоиҳа кам кардани талафоти оби истеҳсолшуда, насби ҳисобкунакҳои обӣ ва рушди потенсиали идоракунию иқтидори худкифоии молиявии КВД «Обу корези шаҳри Душанбе» маблағҳои иловагии грантиро дар ҳаҷми 12 миллион $ ихтисос диҳад. Ин масъала зимни мулоқоти Раиси шаҳри Душанбе  Маҳмадсаид Убайдуллоев бо  роҳбари гурӯҳи Лоиҳаҳои Бонки Ҷаҳонӣ дар кишварҳои Осиёи Марказӣ Пер Франческо Мантованӣ дар Душанбе матраҳ шуд. Ҷонибҳо ҳамзамон, масъалаҳои ҷараёни татбиқи Лоиҳаи бо обтаъминкунии шаҳри Душанбе, ки аз ҷониби Бонки мазкур маблағгузорӣ шудааст,  мавриди баррасӣ қарор доданд. Мусоҳибон таҳияи Консепсияи ҷадиди фарогири рушди минбаъдаи системаи обтаъминкунии шаҳри Душанберо ҳамчун идомаи марҳилаи дуюми Лоиҳаи мавҷуда арзёбӣ карданд. Маҳмадсаид Убайдуллоев  бо баррасӣ аз пешниҳоди Пер Франческо Мантованӣ гуфт, ки идомаи ҳамкориҳо бо Бонки Ҷаҳонӣ баҳри таъмини амнияти истеъмолӣ ва дастрасии аҳолии пойтахт бо оби нӯшокии хушсифат аз нақшаҳои характери дурнамодоштаи шаҳрдорӣ аст. Дар робита зикр шуд, ки Таҳияи Консепсияи мавриди таваҷҷӯҳ бо назардошти таҷдиди хатҳои корезӣ, муайянсозии сарчашмаи камхарҷи истеҳсолу интиқоли об ба аҳолӣ, яъне гузариш ба обҳои зеризаминӣ  ё худ манбаъҳои безарару равони табиӣ омода карда шавад. Дар ин сурат Мақомоти иҷроияи маҳаллии ҳокимияти давлатӣ дар шаҳри Душанбе омодааст созишномаҳои грантиву қарзиро ба маблағи 150-200 миллион  $ бо азхудкуниашон дар мӯҳлати 10 сол дар асоси рушди меъморӣ тибқи Нақшаи генералии шаҳр ба имзо расонад. Ҳамчун хамшарикӣ дар татбиқи Консепсияи мазкур насби ҳисобкунакҳои обиро барои 158 000 муштарии КВД «Обу корези шаҳри Душанбе», ки алҳол аз ин миқдор ҳамагӣ 7,5 ҳазор адад насб карда шудаанд,  бо дастрасозии қарзҳои буҷавӣ ба корхонаи коммуналии хизматрасон  таъмин созад. Назар ба иттилои котиби матбуотии Раиси шаҳри Душанбе Шавкат Саидов, дар анҷом ҷонибҳо ба мувофиқа расиданд, ки гурӯҳҳои кории тарафҳо дар мӯҳлатҳои кӯтоҳтарин асосҳои техникии Консепсияро дар ҳамкорӣ таҳия ва ба баррасии Раиси шаҳри Душанбе пешниҳод намоянд.