АНҶУМАНИ ҒАЙРИНАВБАТИИ КОНФЕДЕРАТСИЯИ ФУТБОЛИ ОСИЁ

Душанбе,  7 июн. (АМИТ «Ховар», Пайрав  Назаров). —  Дар  арафаи  оғози  мусобиқоти  қаҳрамонии  дастаҳои  футболи  мамлакатҳои  ҷаҳон 8 июн  дар  Ҷумҳурии  Африқои  Ҷанубӣ анҷумани  гайринавбатии  Федератсияи  футболи Осиё  кушода  мешавад.  Дар  он  намояндагони  45  мамлакати  қитъаи  Осиё ширкат  меварзанд.  Пешбинӣ  карда  мешавад, ки дар  анҷуман   бештар  аз  150  намоянда иштирок  хоҳад  кард. Мухбири  АМИТ «Ховар»  хабар  медиҳад, ки  аз  Тоҷикистон  дар  анҷумани  мазкур   раиси  Федератсияи  футболи  мамлакат  Сӯҳроб  Қосимов,  Муншии  умумии  он  Шералӣ  Давлатов  ва  муовини  раиси  Федератсияи  футбол  Валерий  Турсунов  иштирок  хоҳанд  кард.  Онҳо барои  иштирок  дар  анҷуман  ба  шаҳри  Иоханнесбург  рафтанд. Дар  анҷуман   ба Оинномаи  Федератсияти  футболи  Осиё  тағйироту  иловаҳо  дохил  намуда,  мазмуну  мундариҷаи  он  ба  талаботи  Федератсияи  ҷаҳонии  футбол  мувофиқ  гардонида  мешавад. Сипас  иштирокчиёни  анҷуман  ҳисоботи   раиси Конфедератсияи  Футболи Осиё  Муҳаммад бинни  Ҳаммом  ва  муовини  раиси Федератсияи  футболи  ҷаҳон  Чун Мон Чжунро  баррасӣ  менамоянд. Дар  анҷуман  танҳо  намояндагони   давлати Бруней  иштирок надоранд. Зеро Федератсияи  футболи  Осиё  ин  мамлакатро  барои  дахолати  давлат  ба   корҳои  Федератсияи  футбол  аз  узвияти  хеш  хориҷ  карда буд.  Анҷумани  пештараи Федератсияи  футболи  Осиё соли  2005  дар  Марокаш  баргузор  гардида буд.   Ҳайати  Тоҷикистон ғайр  аз  анҷумани  мазкур   дар  маҷдиси  намояндагони  конфедератсияҳои  миллии  футболи аъзои  Федератсияи  ҷаҳонии  футбол низ ширкат  меварзад.