ИШТИРОКИ 250 НАФАР СОҲИБКОРОНИ АФҒОН ДАР АНҶУМАНИ ТИҶОРАТӢ

Душанбе, 17 июн. (НИАТ «Ховар», Марзия Саидова). — 65 ширкати истеҳсолию саноатии афғонӣ дар дуюмин намоишгоҳи пешрафтҳои  иқтисодии Афғонистон дар Душанбе маҳсулоти худро ба маърази тамошо ва фурӯш мегузоранд. Назар ба иттилои атташеи тиҷоратии Сафорати Афғонистон дар Душанбе Наҷибулло Раҳимӣ,  намоишгоҳ  рӯзҳои 25-27 июн дар Муҷтамеи давлатии «Кохи Борбад» баргузор мешавад. Наҷибулло Раҳимӣ афзуд, ки ҳадафи намоишгоҳ тақвияти ҳамкориҳои иқтисодию тиҷоратӣ байни ду кишвари ҳамҷавор- Тоҷикистон ва Афғонистон буда, он метавонад дар муаррифии молу маҳсулоти корхонаю ширкатҳои саноатию истеҳсолии Афғонистон дар Тоҷикистон мусоидат намояд. Бояд тазаккур дод, ки намоишгоҳ бо ибтикори палатаҳои савдою саноати Тоҷикистон ва Афғонистон ташкил карда шуда, дар он молҳои саноатӣ, саноеъи дастӣ, хӯрокворӣ ва дигар молҳои ниёзи мардум ба намоиш ва фурӯш гузошта мешаванд.  Дар доираи баргузории намоишгоҳ дар меҳмонхонаи «Hayat Regency» мулоқоти доираҳои тиҷоратии ҳар ду  кишвар бо иштироки 250 нафар соҳибкору сармоягузори Афғонистон   барпо мегардад, ки дар он масъалаҳои тавсеаи ҳамкории иқтисодию тиҷоратӣ Тоҷикистон ва Афғонистон ва дурнамои он дар шароити феълӣ баррасӣ мегардад. Ҳайати соҳибкорону тоҷирони Афғонистонро дар намоишгоҳ Вазири тиҷорати ин кишвар Ғуломмуҳаммади Айлокӣ ва дигар намояндагони баландпояи ин кишвар роҳбарӣ менамоянд. Атташеи тиҷоратии Сафорати Афғонистон дар Душанбе афзуд, ки новобаста ба бӯҳрони ҷаҳонии молиявӣ дар соли 2009 гардиши мол байни Тоҷикистон ва Афғонистон 72 миллион долларо ташкил дода буд.