МУРОҶИАТИ КУМИТАИ ҲОЛАТҲОИ ФАВҚУЛОДДА ВА МУДОФИАИ ГРАЖДАНӢ

Душанбе, 17 июн. (АМИТ «Ховар», Жасмин Назарова). – Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон ба диққати шаҳрвандон ва меҳмонони Ҷумҳурии Тоҷикистон мерасонад, ки баланд шудани ҳарорати гармии ҳаво ва оғоз шудани мавсими шиноварӣ-оббозӣ дар дарёҳо, обанборҳо, каналҳо ва ҳавзҳо, ки ба таҳдиди эҳтимоли ғарқшавии шаҳрвандон оварда мерасонад, эҳтиёткориро талаб менамояд. Боиси тазаккур аст, ки аз аввали мавсими гармиҳо дар ҷумҳурӣ якчанд ҳодисаҳои ғарқшавии шаҳрвандон ба қайд гирифта шудааст. Чунин ҳодиса 15 июни соли равон дар натиҷаи боришоти шиддатнок дар ҷамоати деҳоти Симиганҷ деҳаи Нозирободи шаҳри Ваҳдат сатҳи оби каналу ҷӯйборҳо баланд шуда аз соҳил берун баромад. Дар натиҷа ҳаракати нақлиёт дар шоҳроҳи Ваҳдат — Ромит муваққатан қатъ гардид, инчунин ба хонаи истиқоматии шаҳрвандон, заминҳои назди ҳавлигӣ, кишти зироатӣ хоҷагии халқ зарар расонид. Бинобар ин, Кумита аз шаҳрвандони Тоҷикистон тақозо дорад, ки барои ҳимояи ҳаёти шахсии худ ва наздиконашон ҳангоми истироҳат ва шиноварӣ дар наздикии дарёҳо ва обанборҳо қоидаҳои бехатариро риоя намуда, аз оббозӣ дар ҷойҳои манъшуда ва дарёҳои тезҷараён худдорӣ кунанд.   Айни замон комиссияи ҳолатҳои фавқулоддаи шаҳру ноҳияҳо якҷоягӣ бо хадамотҳои дахлдор ба кори худ шурӯъ намуданд.