ПАРЛУМОНИ ТОҶИКИСТОН ҚОНУНИ НАВ АЛАЙҲИ КОРРУПИСИЯРО ҚАБУЛ КАРД

Душанбе, 3 июн.(АМИТ «Ховар», Марзия  Саидова).-2 июни соли 2010 палатаи поёнии парлумони Тоҷикистон дар ҷаласаи навбатии иҷлосияи якуми Маҷлиси намояндагон Қонуни Ҷумҳурии Тоҷикистон «Дар бораи идоракунии моливӣ ва назорати дохилӣ дар бахши давлатӣ»-ро баррасӣ ва қабул кард. Муовини вазири молияи ҷумҳурӣ Ҷамшед Норинов зимни шарҳи мӯҳтаво ва аҳамияти қонуни нав иброз дошт, ки он  бо мақсади мутобиқ намудани  идоракунии молияи  давлатӣ ба стандартҳои байналмилалӣ ва дар амал татбиқ намудани  стратегияи рушди назорати давлатии молиявӣ дар Ҷумҳурии Тоҷикистон,  стратегияи идоракунии молияи давлатӣ дар Ҷумҳурии Тоҷикистон  барои солҳои 2009-2018,  нақшаи сесолаи амал баҳри татбиқи ин стратегия  ва баланд бардоштани масъулияти хизматчиёни давлатӣ дар  идоракунии молияи давлатӣ таҳия шудааст. Ҷ. Норинов афзуд, ки қонуни мазкур дар таърихи қонунгузории молияи Ҷумҳурии Тоҷикистон  бори нахуст таҳия карда шудааст. Он ифодагари соҳибистиқлолии Тоҷикистон  ва мустақилияти низоми молиявӣ дар кишвар аст.      Самти қонуни мазкур баҳри самаранок истифода кардани маблағҳои буҷетӣ, низоми назорати дохилӣ дар бахши давлатӣ, ноил гардидан ба мукаммалии иттилооти молӣ,  идорӣ,  фаъолияти  натиҷанокии  сарфаҷӯёнаю самарабахши муассисаҳои буҷетӣ ва риояи қонунгузории амалкунандаи ҷумҳурӣ  равона карда мешавад. Ҷамшед Норинов афзуд, ки қонуни  мазкур ӯҳдадорӣ ва масъулияти роҳбарони идораҳои давлатиро дар татбиқ намудани назорати дохилии молиявӣ муайян мекунад. Тибқи ин қонун назорати дохилӣ дар бахши давлатӣ пурзӯр гардонида шуда, сатҳи коррупсия дар муассисаҳои давлатӣ коҳиш меёбад. Тибқи ин қонун дар вазорату идораҳои давлатии Тоҷикистон, ки беш аз 800 нафар корманд ва 1,5 миллион сомонӣ нишондиҳанда доранд,   шӯъбаи назорати молиявӣ ташкил карда мешавад. Норинов афзуд, ки алҳол дар 5 вазорати пилотии Тоҷикистон назорати аудитӣ дохилӣ фаъолият дорад. Дар асоси ин қонун шаффофияти истифодаи маблағҳои буҷавӣ дар идораҳои давлатӣ ва ҷорӣ намудани чорабиниҳои зиддикоррупсионӣ дар муасисаҳои давлатӣ ба роҳ монда мешавад. Қонуни нав аз ҷониби парлумони Тоҷикистон бо он сабаб таҳия ва қабул шуд, ки дар баъзе муассисаю идораҳои давлатии Тоҷикистон самаранок истифода нашудани маблағҳои буҷавӣ, афзоиши хароҷотҳои ғайримақсаднок ва фасод мушоҳида мегардад.