РУШДИ ҲАМКОРИҲО БО СОЗМОНИ ОЗУҚА ВА КИШОВАРЗӢ (ФАО)

Душанбе, 16 июн. (АМИТ «Ховар», Лаззат Диловарзод).- Вазири кишоварзии Ҷумҳурии Тоҷикистон Қосим Қосимов  бо ёрдамчии директории генералӣ, намояндаи минтақаи Осиёи Марказӣ дар Аврупо ва дафтари минтақавии Созмони озуқа ва кишоварзӣ (ФАО) дар Будапешт, хонум Френандо Гусриер ва ҳамоҳангсози Барномаи  ФАО- и СММ дар Тоҷикистон ҷаноби Насим Ҷавод вохӯрӣ намуд. Вазир зимни вохӯрӣ аз ҳамкориҳои дуҷониба бо Созмони озуқа ва кишоварзӣ ( ФАО)-и СММ, ки дар рушди соҳаи кишоварзии ҶТ кӯмакҳои зиёд мерасонад, изҳори миннатдорӣ намуд. Ҳамзамон,  вазир дар ин вохӯрӣ иброз дошт, ки саҳми ин созмони бонуфузи байналмиллалӣ дар доираи ҳамкорӣ дар самти таъмини амнияти озуқаворӣ ва рушди соҳаи аграрӣ хеле калон аст. Созмони озуқа ва кишоварзӣ  дар давоми солҳои 1996- 2009 ва панҷ моҳи соли ҷорӣ барои амалӣ гардидани барномаҳои кишоварзӣ 13 млн. 160 ҳазор доллар кӯмак намудааст.