ҶАЛАСАИ ШӮРОИ РОҲБАРОНИ МАҚОМОТИ МУБОРИЗА БО МАВОДИ НАШЪАОВАР ДАР ДУШАНБЕ

Душанбе, 1 июл. (АМИТ «Ховар», Жасмин Назарова). – 2 июли соли 2010 ҷаласаи навбатии Шӯрои роҳбарони мақомоти салоҳиятдор оид ба мубориза бо муомилоти ғайриқонунии маводи нашъаовари давлатҳои узви Созмони Паймони амнияти дастаҷамъӣ (СПАД) таҳти раёсати Директори Хадамоти Федералии Федератсияи Россия оид ба назорати муомилоти маводи мухаддир Виктор Иванов доир мегардад. Тавре аз дафтари матбуоти Агентии назорати маводи нашъаовари назди Президенти ҶТ иттилоъ доданд, қарор аст дар ҷаласа масъалаҳои инкишофи минбаъдаи Шӯрои роҳбарони мақомоти салоҳиятдор оид ба мубориза бо муомилоти ғайриқонунии маводи нашъаовар ва ҳамкориҳои зиддимухаддиротӣ бо сохторҳои созмонҳои минтақавӣ, таъсиси гурӯҳи кории Шӯрои роҳбарони мақомоти салоҳиятдор оид ба мубориза бо муомилоти ғайриқонунии маводи нашъаовар дар мавриди татбиқи фаврӣ, тасдиқи нақшаи тақвимии омодагӣ ба амалиёти фаврӣ-пешгирикунандаи «Канал — 2010» баррасӣ мегардад. Бояд қайд кард, ки 1 июли соли равон мулоқоти Президенти ҶТ Эмомалӣ Раҳмон бо Директори Хадамоти Федералии Федератсияи Россия оид ба назорати муомилоти маводи мухаддир Виктор Иванов баргузор гардид. Дар мулоқот ҷонибҳо масъалаҳои ҳамкориҳои дуҷониба ва минтақавиро дар самти мубориза бо муомилоти ғайриқонунии маводи нашъаовар, чораву тадбирҳо барои пешгирӣ аз қочоқи воситаҳои нашъаовар аз Афғонистонро мавриди муҳокима қарор доданд.   Дар ҷаласа Котиби генералии СПАД Николай Бордюжа, роҳбарони мақомоти салоҳиятдории Арманистон, Тоҷикистон, Беларусия, Россия, Қазоқистон, Қирғизистон ва Ӯзбекистон, ҳамчунин роҳбарони дигар мақомоти ҳифзи ҳуқуқи ҶТ  ширкат меварзанд.