АМАЛӢ ШУДАНИ ДАСТУРИ САРВАРИ ДАВЛАТ

Душанбе, 7 июл. (АМИТ «Ховар», Лаззат Диловарзод).- Баъди гузаштан ба лампаҳои каммасраф шикояти шаҳрвандон нисбат ба  сифати чунин лампаҳо зиёд гардид. Маълум шуд, ки баъзе тоҷирони ватанӣ барои ворид сохтани фурӯзонакҳои каммасраф ба корхонаҳои кооперативии давлатҳои истеҳсолкунанда дархост пешниҳод намуда, лампаҳои арзони каммасрафро вориди Тоҷикистон мекардаанд. Тибқи дастури Сарвари давлат, барои таъмини аҳолӣ бо лампаҳои каммасраф дар қаламрави кишвар корхонаҳои тавлиди чунин лампаҳо ба роҳ монда мешаванд. Чунин як корхона дар заминаи супориши Сарвари давлат дар шаҳри Чкалови вилояти Суғд ба истеҳсоли фурӯзонакҳои арзишашон нисбат ба маҳсулоти хориҷӣ арзон   шурӯъ кард. Бино ба иттилои дастгоҳи раиси вилояти Суғд,  алҳол корхонаи истеҳсолкунандаи лампаҳои каммасрафи шаҳри Чкалов дар як моҳ 150 ҳазор фурӯзонакҳои каммасраф истеҳсол менамояд. Боис ба ёдоварист, ки  бо супориши Ҳукумати Ҷумҳурии Тоҷикистон ба 75 ҳазору 800 оилаҳои камбизоати шаҳру навоҳии  ин вилоят 606 ҳазору 400 дона лампаҳои каммасраф ба таври ройгон тақсим шуданд. Акнун бо ёрии мутахассисони чинӣ аввалин корхонаи истеҳсолкунандаи лампаҳои каммасраф бунёд гардид ва барои рақобатпазирии бозори дохилӣ бунёди боз   чанд корхонаи истеҳсолкунандаи лампаҳои каммасраф зарур аст.