ЛОИҲАҲОИ НАВ АМАЛӢ МЕГАРДАНД

Душанбе, 26 июл. (АМИТ  «Ховар»,  Назокат Қодирова).- Дар нимсолаи  аввали соли 2010 аз тарафи  «Маркази идораи  лоиҳаи барқарорсозии  системаҳои  ирригатсионӣ»-и Вазорати мелиоратсия ва захираҳои  оби ҷумҳурӣ 52  адад механизм  ва нақлиёти гуногунтамғаи  нав харида шуд,ки  дар бартараф  намудани   оқибатҳои офати табиӣ  дар шаҳру  ноҳияҳои   минтақаи Кӯлоб  истифода бурда шуда,  дар ҳаҷми  1463,6 ҳазор сомонӣ  корҳоро иҷро намуданд. Дар ин самт 360  нафар кормандони  ташкилоту корхонаҳои  Вазорат саҳм  гузоштанд. Бо мақсади мӯътадил  намудани  вазъи соҳа  дар назди Вазорат  марказҳои  татбиқи  лоиҳаҳо, аз ҷумла  Марказҳои  идораи  татбиқи  лоиҳаҳои  «Барқарорсозии кишоварзӣ», « Барқарорсозии системаҳои  ирригатсионӣ», «  Идоракунии захираҳои  обии водии  Фарғона», «Обёрии заминҳои Данғара» ва « Идоракунии хавфи обхезӣ  дар вилояти  Хатлон»  ба маблағи  145,9 млн. доллари амрикоӣ  татбиқ  шуда  истодаанд. Аз аввали татбиқи  лоиҳаҳо  азхудкунии  ин маблағҳо  дар шаш моҳи  соли 2010 6,2млн. доллари  амрикоӣ ё 102 фоизи нақшаро  ташкил медиҳад. Амалӣ гаштани  лоиҳаҳои  мазкур имкон  медиҳад, ки  вазъи бо об  таъмин намудани  аҳолӣ, хоҷагиҳо ва дигар  корхонаю муассисот беҳтар гардад.