ТАҲИЯ ЛОИҲАИ РОҲИ МОШИНГАРДИ ДУШАНБЕ- ТУРСУНЗОДА ИДОМА ДОРАД

Душанбе, 27 июл. (АМИТ «Ховар», Лутфия Эшонқулова).-Тармиму таҷдиди роҳи мошингарди  Душанбе- Турсунзода -сарҳади Ҷумҳурии Ӯзбекистон моҳи марти соли 2011 оғоз хоҳад гардид, -гуфт имрӯз, зимни нишасти матбуотӣ директори Маркази татбиқи лоиҳаҳои таҷдиди роҳҳо Низом Ҳакимов. Ӯ афзуд, ки то имрӯз корҳои топографӣ, тадқиқотӣ, геологӣ, гидрологӣ ташхиси купрӯкҳо ва қубурҳои обгузар ба анҷом расида, аз тарафи машваратчӣ ба Бонки Осиёгии Рушд (БОР) ва Вазорати нақлиёт ва коммуникатсияи ҶТ  ҳисоботи ҷамъбастӣ пешниҳод карда шуд. Лоиҳаи мазкур таҷдиди 61, 5 км роҳро дар самти Душанбе- Турсунзода-сарҳади Ҷумҳурии Ӯзбекистон дар бар мегирад.  Паҳноии роҳ аз Душанбе то Турсунзода  25 метр (бо чор хати харакат) ва аз  Турсунзода то сарҳади Ҷумҳурии Ӯзбекистон 15 метрро (бо ду хати ҳаракат) ташкил медиҳад. Дар асоси ҳисоби пешакӣ маблағи умумии лоиҳа 151 миллион доллари ИМА-ро ташкил медиҳад. Айни ҳол аз тарафи БОР 51 миллион доллари ИМА ба тариқи грант пешбинӣ шуда, аз тарафи Ҳукумати Тоҷикистон бояд 27 миллион доллари ИМА  барои пардохти андоз, ҷуброни кӯчонидани хонаҳои истиқоматӣ ва иншооти канори роҳ ҷудо карда шавад. Таҳия ва баррасии нақшаи асосноккунии техникии тармиму таҷдиди роҳи мазкур то охири соли равон ба охир мерасад.