ЯРМАРКАИ ҶОИ КОРИ ХОЛӢ ДАР ҲАМАДОНӢ

Ҳамадонӣ, 9 июл. (АМИТ «Ховар», Сулаймон  Холов). — Агентии ҳифзи иҷтимоии шуғли аҳолӣ ва муҳоҷирати ноҳияи Ҳамадонӣ ҷиҳати таъсис додани ҷойҳои нави корӣ ва ба ин васила баланд бардоштани сатҳи некӯаҳволии мардум пайваста ярмаркаҳои ҷойҳои кории холӣ ва вазифаҳои озодро роҳандозӣ намуда, ба корфармоёну корҷӯён имкониятҳои васеи интихобро фароҳам месозад. Дар ярмаркаи навбатӣ масъулин ва субъектҳои хоҷагидори беш аз 12 ташкилоту корхона 128 ҷойи кори холӣ ва вазифаҳои озодро ба корҷӯён пешниҳод карданд, ки  дар ин  ярмарка  беш  аз  10  нафар  бекорон  бо ҷои  кори  нав  таъмин  гардиданд.           Ёдрас менамоем,ки дар ноҳия дар самти паст кардани сатҳи бекорӣ ва ба шуғли доимӣ фаро гирифтани қувваи қобили меҳнат бо дастгирии мақомоти иҷроияи ҳокимияти давлатӣ ва кормандони Агентии ҳифзи иҷтимоии шуғли аҳолӣ ва муҳоҷират тадбирҳои мушаххас амалӣ карда мешавад. Бояд гуфт, ки дар ярмаркаи навбатии ҷойҳои кор ва вазифаҳои озод шумораи зиёди сокинони ноҳия, аз ҷумла корҷӯён  ширкат варзида, аксари онҳо бо роҳхат ба ҷои кори писандидаашон таъмин ва қисмати дигари корҷӯён, ки ихтисос надоштанд, ба касбомӯзӣ ҷалб карда шуданд. Кормандони Агентии ҳифзи иҷтимоии шуғли аҳолӣ ва муҳоҷирати ноҳия зимни қатори татбиқи амалии корҳо дар ин самт барои беҳдошти ҳифзи иҷтимоии доимии табақаҳои ниёзманд низ чораҳои мушаххас  андешида, дар ин рӯз ба ду нафар собиқадори меҳнат аробачаи маъюбӣ тақдим карданд. Масъулини соҳа ният доранд, ки дар оянда низ барои бо ҷои кори доимӣ таъмин намудани аҳолӣ ва беҳдошти шароити зисти шаҳрвандони ноҳия тадбирҳои мушаххас андешанд.