1 СЕНТЯБР МУЖДА АЗ СОЛИ НАВИ ТАҲСИЛ

Душанбе, 31 август.(АМИТ «Ховар», Марзия Саидова).-Пагоҳ дар саросари ҷумҳурӣ соли нави таҳсили 2010-2011 оғоз ёфта, садои занги аввал тамоми толибилмонро  паси мизи мактабӣ даъват менамояд. Тибқи иттилои сардори маркази матбуоти Вазорати маорифи ҷумҳурӣ Ноилшо Нуралиев дар соли равон  беш аз 1 миллиону 600 ҳазор талаба дар  3780 мактаби таҳсилоти умумии кишвар ба таҳсил фаро гирифта мешаванд, ки аз он 167 000 нафарашон  хонандагони синфи якум буда,  бори нахуст ба остонаи дабистон қадам мегузоранд. Ноилшо Нуралиев афзуд, ки тӯли солҳои охир маҳз бо ғамхории роҳбарияти Ҳукумати ҷумҳурӣ дар соҳаи маорифи кишвар дастовардҳои беназир ба чашм мерасанд. Танҳо дар зарфи як сол – аз моҳи сентябри соли 2009 то сентябри 2010 дар минтақаҳои гуногуни  ҷумҳурӣ 184 мактаб барои  35 ҳазор ҷойи нишаст ба истифода дода шуд, ки ба рушди соҳаи маориф дар  кишвар мусоидат менамояд.