150 СОЛАГИИ З. ҶАВҲАРӢ ВА РӮЗИ РӮДАКӢ ДАР СУҒД

Душанбе, 23 август. (АМИТ «Ховар», Бекназари  Абӯбакр). — 150-солагии нависандаи тоҷик Зуфархон Ҷавҳарӣ моҳи сентябри соли ҷорӣ дар вилояти Суғд таҷлил карда мешавад. Дар ин бора аз  маркази  матбуоти маъмурияти  вилояти Суғд ба хабарнигори АМИТ «Ховар»   хабар доданд. Дар доираи ҷашни мазкур вохӯрии адабиётшиносон дар зодгоҳи З. Ҷавҳарӣ дар шаҳри Истаравшан баргузор мегардад. Ҳамчунин, мулоқоти профессор Отахон Сайфуллоев бо донишҷӯёни Донишгоҳи давлатии ба номи Бобоҷон Ғафурови шаҳри Хуҷанд ва мизи мудаввар дар мавзӯи «Нақши Зуфархон Ҷавҳарӣ дар адабиёти тоҷик» ба нақша гирифта шудааст.  Мақсади гузаронидани ин чорабинӣ ташвиқу тарғиби  эҷодиёти З. Ҷавҳарӣ мебошад.  Қарори дигари раиси вилояти Суғд ин рӯзи 22 сентябр дар вилоят ҷашн гирифтани Рӯзи Рӯдакӣ мебошад. Дар доираи ҷашни Рӯзи Рӯдакӣ гузаронидани як қатор чорабиниҳо ба нақша гирифта шудааст. Дар ин рӯз дар Маркази ҷавонони ба номи Лоиқ Шералӣ филми ҳунарии  «Қисмати шоир» нишон дода мешавад. Ёдовар мешавем, ки Рӯзи Рӯдакӣ аз оғози соли 2002 инҷониб дар Тоҷикистон таҷлил карда мешавад. Соли 2008  дар ҷумҳурӣ бахшида  ба 1150 солагии  сарояндаи мумтози  шеъри ноби форсӣ-тоҷикӣ соли Рӯдакӣ эълон гашта буд.