55 АДАД ҒИЛОФАКИ ПУР ДАР МЕЪДА

Душанбе, 23 август. (АМИТ “Ховар”, Лутфия Эшонқулова). — Кормандони Агентии назорати маводи нашъаовари назди Президенти Ҷумҳурии Тоҷикистон фаъолияти як гурӯҳи калони муташаккили ҷиноиро, ки ба қочоқи  маводи мухаддири тавлиди Афғонистон ба Федератсияи Русия машғул буданд, ошкор намуданд. 16 августи соли равон кормандони Агентӣ  дар фурӯдгоҳи пойтахт бо гумони интиқоли ғайриқонунии маводи мухаддир донишҷӯи 19 солаи яке аз мактабҳои олии кишвар, зодаи ноҳияи Шаҳритӯс, ки нияти парвоз ба Маскавро  дошт, дастгир намуданд. Зимни муоина аз меъдаи ӯ 55 адад ғилофаки пур аз героин, ки  463 граммро ташкил медод,дарёфт ва мусодира гардид. Зимни гузаронидани корҳои фаврӣ-ҷустуҷӯӣ ва тафтишотӣ се тан аз узви дигари ин гурӯҳи ҷиноӣ, аз ҷумла як зани 45 сола, ки то ин муддат ду маротиба барои ширкат дар муомилоти ғайриқонунии маводи мухаддир аз озодӣ маҳрум шуда буд, боздошт гардиданд. Айни замон ин чор нафар, ки як гурӯҳи муташаккили ҷиноиро ташкил медиҳанд, дар боздоштгоҳи муваққатии Агентӣ қарор доранд ва аз рӯи моддаи 200, қисми 3 “Муомилоти ғайриқонунии воситаҳои нашъаовар ва ё моддаҳои психотропӣ бо мақсади фурӯш, такроран содир намудан аз ҷониби гурӯҳи шахсон бо маслиҳати пешакӣ” ва моддаи 32, қисми 3: “Омодасозӣ ба содир кардани ҷиноят ва сӯиқасд ба ҷиноят” парвандаи ҷиноятӣ боз шуда, тафтиш идома дорад. Дар ин бора аз маркази матбуоти Агентии назорати маводи нашъаовари назди Президенти Ҷумҳурии Тоҷикистон ба хабарнигори АМИТ “Ховар” хабар доданд.