АФЗОИШИ ИСТЕҲСОЛИ САБЗАВОТ ДАР РӮШОН

Рӯшон, 11 август. ( АМИТ «Ховар», Л Додо).- Ноҳияи Рӯшон нисбат  ба навоҳии  дигари ВМКБ  барои  рушди соҳаи  сабзавоткориву боғдорӣ шароити  беҳтарро  соҳиб аст, зеро ҳам замини  зиёди корам  дораду ҳам  оби фаровон. Соли  2009 дар ноҳия  дар майдони 201 гектар картошка  ва 195 гектар сабзавот  кишт карда шуд. Дар натиҷаи  заҳмати дилсӯзонаи  деҳқонон  аз ҳар гектар 280 сентнерӣ сабзавот, 230 сентнерӣ картошка  ҷамъоварӣ гардид. Дар хоҷагии «Нури Ваҳдат»-и ноҳия   бошад, аз ҳар гектар 400 сентнерӣ пиёз ва 350 сентнерӣ картошка ҷамъ  оварда шуд. Тавре аз раёсати  кишоварзии ноҳия иттилоъ доданд, имсол  дар    ноҳия ҳосил  хуб аст. Картошкаю сабзавот нисбат ба соли  2009 1,5 баробар бештар  ҷамъоварӣ гаштааст. Ин  бошад ба  фаровонҳосилӣ  ва пурнозу неъмат  гаштани дастурхони  аҳолӣ оварда мерасонад.