БАРҚИЯИ Э. РАҲМОН БА ПРАТИБХА ПАТИЛ

15 августи соли 2010 Президенти Ҷумҳурии Тоҷикистон Эмомалӣ Раҳмон ба Президенти Ҷумҳурии Ҳиндустон Пратибха Патил барқияи табрикӣ ирсол намуд, ки дар он, аз ҷумла, омадааст: Хонуми Олиҷоҳ, Сарфарозам, ки Шумо ва мардуми Ҳиндустонро ба муносибати ҷашни солгарди истиқлоли кишвари дўст самимона табрик ва таҳният гўям. Ҳамкориҳои мутақобилан судманди Тоҷикистону Ҳиндустон ҳанўз аз миёнаҳои солҳои 90-уми асри гузашта асоси боэътимоди қарордодиву ҳуқуқӣ пайдо карда, дар тўли солҳои минбаъда барои ҳарду ҷониб натиҷаҳои хубу назаррас ба бор оварданд. Бо истифода аз ин фурсати фараҳбахш, изҳори итминон менамоям, ки муносибатҳои дўстона ва ҳамкориҳои муфиди тарафайн  дар соҳаҳои мухталиф дар оянда низ ба манфиати мардумони ҳар ду кишвар бо суръати бештар рушду тавсеаи пайгир хоҳанд ёфт. Ҷониби Тоҷикистон барои таҳкими ҳар чӣ бештари ин муносибатҳо, ки омили муҳими таъмини сулҳу субот ва густариши фазои солими ҳамкории созанда дар минтақаҳои Осиёи Марказӣ ва Ҷанубӣ мебошанд, саъю кўшиши заруриро ба харҷ хоҳад дод. Бо ибрози беҳтарин орзуҳо, ба Шумо, Хонуми Олиҷоҳ, сиҳатии комил ва комёбиҳои навин ва ба мардуми дўсту фарҳангпарвари ҳиндустон сулҳу субот, шукуфоӣ ва саодатро хоҳонам.  Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.