БАРНОМАҲОИ ИДОНАИ КОНСЕРТӢ ДАР МАҲАЛЛАЮ ШАҲРАКҲО

Душанбе, 17 август. (АМИТ «Ховар», Марзия Саидова).- Бо мақсади дар сатҳи баланд таҷлил намудани 19-умин солгарди ҷашни Истиқлолияти давлатии Ҷумҳурии Тоҷикистон  кормандони шӯъбаи фарҳанги ноҳияи Ҳисор  намоиши театрикунонидашударо таҳти унвони «Васфи туро месароям,  Тоҷикистон» таҳия намуданд. Барномаи мазкур дар рӯзи Истиқлолияти давлатӣ — 9 сентябр дар маркази маъмурии ноҳия пешкаши меҳмонон ва сокинон гардонида мешавад.  «Бо мақсади ҷолиб ва беҳтар таҳия шудани  барномаи театрикунонидашуда, шӯъбаи фарҳанг 350 нафар донишҷӯёни омӯзишгоҳҳои омӯзгорӣ, тиббӣ ва техникиро ҷалб намудааст», гуфт дар сӯҳбат ба хабарнигори АМИТ «Ховар» мудири шӯъбаи фарҳанги ноҳияи Ҳисор Нуралӣ Мирзоалиев. Намоиши театрикунонидашуда таҷассумгари дастовардҳои беназири даврони мустақилияти Тоҷикистон буда,  дар худ таҳкими дӯстиву рафоқат,  муқаддас доштани марзу буми ватанро тараннум менамояд. Ҳамзамон, дар китобхонаҳои ноҳия намоиши китобҳо ва расму мусаввараҳо ташкил карда шуда, дар 12 ҷамоату маҳаллаҳо ва шаҳракҳои ноҳия барномаи консертии идона бо иштироки ҳунармандони шӯъбаи фарҳанг ташкил карда мешаванд.