ГУФТУШУНИДИ ЭМОМАЛӢ РАҲМОН БО ДМИТРИЙ МЕДВЕДЕВ

Маскав, 18 август (АМИТ «Ховар», Ҳалима Хушқадамова). -Имрӯз, 18 август мулоқоти чоргонаи Президенти Русия Дмитрий Медведев бо Президентҳои ҶТ-Эмомалӣ Раҳмон, Афғонистон-Ҳомид Карзай ва Покистон-Осиф Алӣ Зардорӣ баргузор мегардад. Бино ба иттилои маркази матбуоти Кремл дар доираи саммит ҳамчунин мулоқоти дуҷонибаи сардори давлати Русия бо президентҳои Афғонистон ва Покистон доир мешавад. Дар доираи сафари кории сардори Давлати Тоҷикистон Эмомалӣ Раҳмон дар Русия, ки аз 18 то 20 августи соли ҷорӣ идома меёбад, дар назар аст, ки гуфтушуниди ӯ бо Президенти Русия Дмитрий Медведев баргузор мегардад. Ёдовар мешавем, ки дар ин мулоқот масоили амнияти минтақа, ҳамкориҳои иқтисодӣ, мубориза бо тундгароӣ ва маводди мухаддир баррасӣ хоҳад шуд.