КАМШАВИИ ҲОДИСОТИ СӮХТОР

Душанбе, 12 август. (АМИТ «Ховар», Лутфия Эшонқулова). – Тайи 6-7 моҳи соли ҷорӣ дар ҷумҳурӣ 418 сӯхтор ба қайд гирифта шуд. Зарари моддии ин сӯхторҳо 2 миллиону 41 ҳазору 20 сомониро ташкил медиҳад. Зимни хомӯш кардани сӯхтор 62 нафар одам ва миқдори зиёди маҳсулоти қиматбаҳо ба маблағи 24 миллион сомонӣ, ки 44,9 % нисбат ба ҳамин давраи ҳисоботии соли гузашта зиёд аст, наҷот ва ҳифз карда шуд. Тайи ин муддат 277 сӯхтор дар хонаҳои истиқоматӣ ба амал омад, ки бар асари он 7 нафар, ки 4 тои онро кӯдакон ташкил медод, ба ҳалокат расиданд. Дар муқоиса ба ҳамин давраи соли гузашта теъдоди сӯхтор 14,6 % ва шумораи ҳалокшудагон бошад 63,2% кам шудааст.    Дар ин бора аз маркази матбуоти ВКД ба АМИТ «Ховар» хабар доданд.