ШАРОИТИ МУСОИД БАРОИ МАКТАББАЧАГОНИ КӮЛОБ

Кӯлоб, 30 август. (АМИТ «Ховар», Сулаймон Холов). — Дар  шаҳру  навоҳии  минтақаи Кӯлоб   594   муассисаи  таълимӣ,  аз   ҷумла  534  мактаби  таҳсилоти  умумӣ, 14  литсею  гимназия, 10 интернат, 21  маркази    таҳсилоти  иловагӣ  ва  8  омӯзишгоҳи  касбӣ-техникӣ  фаъолият  дошта,  ба соли нави  таҳсил омодагӣ   мебинанд.  Тибқи  иттилои  мудири  раёсати  маорифи  вилояти  Хатлон  дар минтақаи  Кӯлоб  Эмомалӣ  Сайдамиров тамоми муассисаҳои  таълимӣ  таъмиру тармим гардида,  то  оғози  соли  хониш ҳамаи  синфхонаҳо бо  лавозимоти  хониш   муҷаҳҳаз  гардонида  мешаванд. Эмомалӣ   Сайдамиров,  ҳамчунин   иброз  дошт, ки  то  ба  итмом  расидани    бинои  мактаб  хонандагони  аз  офати  табиӣ  зарардида   дар  мактабҳои  таҳсилоти  умумии  № 27  ва  № 30-  и  шаҳр   таҳсилро  идома медиҳанд, ки  дар онҳо тамоми шароитҳои  лозимӣ  фароҳам  оварда  шудаанд. Ёдовар мешавем, ки бо  пешниҳоди  сарвари  давлат,  Ҷаноби  олӣ  Эмомалӣ  Раҳмон  дар  маҳаллаи  навбунёди  Ваҳдат   барои    1200  ҷойи  нишаст     сохтмони   бинои   мактаби  нав   оғоз  гардид, ки  мувофиқи  нақша   сохтмони  он  то  соли  2012  ба итмом  мерасад.