ТАЪМИНИ АМНИЯТ ДАР РӮЗҲОИ ҶАШН ПУРЗӮР КАРДА МЕШАВАД

Душанбе, 26 август.(АМИТ «Ховар», Марзия Саидова).-Бо мақсади пуршукӯҳ ва дар сатҳи баланд таҷлил намудани ҷашни 19-умин солгарди Истиқлолияти Ҷумҳурии Тоҷикистон дар пойтахт Раиси шаҳри Душанбе Маҳмадсаид Убайдуллоев қарор ба тасвиб расонд. Дар асоси қарори мазкур муовинони раиси шаҳр, раисони чор ноҳияи пойтахт ва  роҳбарони сохторҳои  марбутаи шаҳри Душанбе  дар мувофиқа бо сохторҳои ҷумҳуриявӣ муваззаф гардидаанд, ки тамоми шароити заруриро барои дар сатҳи баланд ва сазовор истиқбол гирифтани ҷашни 19-умин солгарди Истиқлолияти давлатии Ҷумҳурии Тоҷикистон дар шаҳри Душанбе  муҳайё сохта, ороиши  идонаи шаҳрро  дар сатҳи баланд ба роҳ монанд. Тибқи ин қарор, ҳамзамон  Раёсати корҳои дохилии шаҳри Душанбе, Раёсати Кумитаи давлатии амнияти миллии Ҷумҳурии Тоҷикистон дар шаҳри Душанбе вазифадор гардидаанд, ки дар рӯзҳои таҷлили ҷашни Истиқлолияти давлатӣ дар пойтахт  баҳри таъмини амнияти шаҳрвандон, ҳифзи тартиботи ҷамъиятӣ чораҳои иловагӣ андешанд. Котиби матбуотии Раиси шаҳри  Душанбе Шавкат Саидов ба АМИТ «Ховар» иттилоъ дод, ки дар асоси ин қарор аз сокинони пойтахт даъват ба амал оварда шудааст, ки дар рӯзҳои  ҷашни Истиқлолият тартиботи ҷамъиятӣ ва Маромномаи сокини пойтахтро риоя намоянд.