ВАРЗИШГАРИ ТОҶИК БА ДАВРИ НИҲОӢ БАРОМАД

Душанбе, 17 август. (АМИТ «Ховар», Пайрав Назаров). — Варзишгари ҷавони тоҷик Баҳодур Қодиров дар сабқати гӯштини озод дар вазни то 63 килограмм дар нахустин Бозиҳои тобистонаи олимпии наврасон дар Сингапур бар рақибонаш се пирӯзӣ ба даст овард.   Баҳодур Қодиров рӯзи 17-уми август дар рақобатҳо нахуст бар Муҳаммад Будара аз Алҷазоир бо ҳисоби 4:0 ғолиб шуд. Баъдан Амдеоус Перераро аз Гвинея бо ҳисоби 3:0 мағлуб кард. Рақиби сеюми Баҳодур Квинтон Мерфий аз Иёлоти Муттаҳидаи Амрико буд. Паҳлавони тоҷик бо гӯштингири амрикоӣ қувваозмоӣ намуда, бо ҳисоби 3:1 ғолиб гардид. Баҳодур Қодиров барои ба даст овардани ҷойи аввал ва медали тиллои олимпӣ бо варзишгари Русия Азаматби Пашнатлов мубориза мебарад.