БОЗДИДИ ТАМОШОБИНИ СЕМИЛЛИОНА АЗ ПАВИЛЙОНИ ТОҶИКОН

Душанбе, 21 сентябр.(АМИТ «Ховар», Марзия Саидова).-Дар павилйони Тоҷикистон  дар намоишгоҳи умумиҷаҳонии ЭКСПО-2010, ки дар Шанхайи Чин баргузор гашта истодааст,  тамошобини семиллионаро ба қайд гирифтанд.  Дар ин хусус ба АМИТ «Ховар» аз Вазорати корҳои хориҷии ҷумҳурӣ иттилоъ доданд. Тамошобини семиллионаи павилйони Тоҷикистон  иқтисодчӣ Йен Чжуини 25 сола буда, сокини вилояти Хунан мебошад.       Дар маросими тантанавӣ Йен Чжуинро сафири фавқулодда ва мухтори Ҷумҳурии Тоҷикистон дар Ҷумҳурии Мардумии Чин Рашид Олимов, Раиси Палатаи савдо ва саноати Ҷумҳурии Тоҷикистон Шариф Саид, директори экспозитсияи  павилйони Тоҷикистон дар ЭКСПО- 2010 Одил Сангов табрик намуда,   ба Йен Чжуин китоби Президенти Ҷумҳурии Тоҷикистон Эмомалӣ Раҳмон «Тоҷикон дар оинаи таърих»-ро, ки ба забони чиноӣ тарҷума шудааст, тақдим карданд.