БОЗДОШТИ ҚОЧОҚЧИЁН БО «ФОЛКСВАГЕН»

Душанбе, 22 сентябр. (АМИТ «Ховар», Лутфия Эшонқулова).- 22 сентябри соли ҷорӣ Идораи Федеролии полиси криминалии Олмон ба Агентии назорати маводи нашъаовари назди Президенти Ҷумҳурии Тоҷикистон се адад автомашинаи тамғаи «Фолксваген» тӯҳфа намуд. Дар маросими супоридани нақлиёт Сафири фавқулодда ва Мухтори Ҷумҳурии Федеролии Олмон дар Ҷумҳурии Тоҷикистон, хонум Дорис Хергрампф ва директори Агентӣ, генерал-лейтенанти милитсия Рустам Назаров ширкат намуданд. Таъкид кардан ба маврид аст, ки ҳамкориҳои судбахши дуҷонибаи мақомоти ҳифзи ҳуқуқ ва сохторҳои қудратии ҷумҳурӣ бо Идораи Федеролии полиси криминалии Олмон аз оғози солҳои 90-уми асри гузашта сарчашма мегиранд. Тӯли ин муддат идораи мазкур ба мақомоти ҳифзи ҳуқуқ ва сохторҳои қудратии ҷумҳурӣ, аз ҷумла ба Агентӣ дар таъмини воситаҳои техникиву ташкилӣ, ташкил ва гузаронидани амалиёти ҳарсолаи байналмиллалии «ТАРСЕТ», омодасозӣ ва такмили ихтисоси кормандон аз тариқи ташкили семинарҳо ва омӯзишҳои мухталиф, ҳамчунин, курсҳои дарозмуддат кӯмакҳои зиёд кардааст. Воситаҳои техникаи имрӯз супоридашуда имкон медиҳанд, ки самаранокии фаъолияти қисмҳои фаврии Агентии назорати маводи нашъаовар баланд гардад.