CӮХТОР ДАР БОЗОР

Кӯлоб, 23 сентябр. (АМИТ «Ховар», Сулаймон Холов). — Сӯхторҳои пай дар пайи дар бозорҳои кишвар, ки давоми ҳашт моҳи охир ба амал омад, ва дар натиҷа миқдори зиёди молу маҳсулоти мардум ба маблағи даҳҳо ҳазор сомонӣ нобуд гардид, Хадамоти давлатии сӯхторнишонӣ ва ҳокимиятҳои маҳаллиро ба ташвиш овардааст. Аз ин рӯ дар ҳамаи бозорҳо санҷиш ва машқҳои бехатарии сӯхтор гузаронида мешавад. Бо дархости раёсати бозори марказии «Саховат»-и  шаҳри Кӯлоб комисияи вакилон дар якҷоягӣ бо Хадамоти давлатии сӯхторнишонӣ машқи бехатарии сӯхтор гузарониданд. Ба гуфти масъулин мувофиқи нақшаи генералӣ дар ҳудуди бозори «Саховат» барои мошини сӯхторнишонӣ бояд 3 гузаргоҳ бошад, ки дар ҳолати рух додани сӯхтор сари вақт тавонанд онро бартараф намоянд. Ҳарчанд мошини сӯхторнишонӣ бо сигнали шартӣ ва чароғакҳояш ба сӯи бозор ҳаракат мекард, дигар нақлиёти шахсию ҷамъиятӣ ба ӯ роҳ намекушоданд.  Ҳангоми гузаронидани чорабинӣ маълум гардид, ки ҳамаи гузаргоҳҳои дохили бозор аз ҷониби соҳибкорон бо девору дӯконҳо маҳкам шуда, имкони ҳаракат кардани техникаи сӯхторнишонӣ ғайриимкон аст. Роҳбарияти кунунии бозори «Саховат» бо кормандони идораи сӯхторнишонӣ дӯкону деворҳо ва дигар мамониятҳоро бартараф намуда, нисбат ба як қатор соҳибкорон санадҳо тартиб доданд. Давоми се соати гузаронидани машқ кормандони ҳифзи тартиботи ҷамъиятии бозор бетарафиро ихтиёр намуданд, ки ин барои кори комиссия душворӣ эҷод намуд. Баъд аз анҷоми чорабинӣ кормандони Хадамоти сӯхторнишонӣ ба таъмири техникаи худ, ки дар ин машқ осеб дида буд, машғул гардиданд.