ДАР ҶУСТУҶӮИ ГУМШУДАГОН

          Душанбе, 23 сентябр. (АМИТ «Ховар», Лаззат Диловарзод).-  Дар Ҷумҳурии Тоҷикистон аввалин бор дар шаҳри Хуҷанд ташкилоти ҷамъиятии «Диёр» таъсис дода шуд.             Мақсад аз таъсиси чунин як ташкилоти ҷамъиятӣ пайдо кардани одамонест, ки бар асари ҳодисаҳои гуногун бедарак  гардидаанд. Ашхоси гумшуда нафақат дар дохили кишвар, балки дар хориҷ аз он ҳам ҷустуҷӯ карда мешаванд,-мегӯяд   роҳбари ин  ташкилот  Баҳриниссо Абдураҳмонова.             Ташкилоти ҷамъиятии «Диёр» ба тарзи хайрия фаъолият мекунад ва дар пайдо кардани  ашхоси бедарак ғайбзада ба хешу табори онҳо кӯмаки  ройгон мерасонад. Ташкилоти мазкур аллакай дар пайдо кардани даҳҳо шаҳрвандон муваффақ шудааст.             Ба гуфти Баҳриниссо Абдураҳмонова, рӯзҳои наздик истиқоматкунандаи шаҳри Радужнии вилояти автономии Ханти Мансии  ФР Жанар Орозалинро, ки 10 сол боз ҷустуҷӯ карда мешавад, тавассути консули генералии Русия дар  шаҳри Хуҷанди вилояти Суғд ба зодгоҳаш интиқол дода мешавад.