КАРТОШКА ҲАМ МОНОПОЛИЯ МЕШАВАД

Душанбе, 27 сентябр. (АМИТ «Ховар», Лаззат Диловарзод).- Тибқи маълумоти фаврии Раёсати растанипарварии Вазорати кишоварзии ҶТ, соли ҷорӣ  дар саросари ҷумҳурӣ  майдони кишти картошка ба 12 ҳазор гектар расонида шудааст.    То 20 –уми сентябри соли ҷорӣ ҳосили майдони 3698,2 гектар картошказор ҷамъоварӣ гардидаст, ки нисбат ба ҳамин давраи соли сипаришуда 457, 2 гектар зиёд аст.    Он чиз боиси нигаронӣ аст, ки бо вуҷуди нисбат ба ҳамин давраи соли гузашта бештар канда ҷамъоварӣ намудани картошка нарх дар бозорҳои ҷумҳурӣ нисбатан боло рафтааст. Мутасаддиёни бозорҳо бошанд болоравии нархро дар таъхири  боркашонӣ медонанд.    Онҳое, ки ба кашонидани борҳои кишоварзӣ дастрасӣ доранд бори бо нархи арзон харидаи худро замоне вориди бозор менамоянд, ки талабот нисбати он зиёд бошад. Ин «тадбир» — и пешакӣ тарҳрезишуда боис шудааст, ки нарх   дар бозор боло рафта, даромади он ба манфиати    монополистони воридкунандаи маҳсулоти кишоварзӣ гардад.    Тибқи нақша истеҳсоли картошка соли ҷорӣ ба 253 ҳазору 309 тонна расонида мешавад. То имрӯз наздик ба 79 ҳазор тонна картошка ҷамъоварӣ шудааст, ки он баробари 30 фоизи нақшаи пешбинишуда мебошад. Дар  27 рӯзи моҳи сентябр нархи картошка аз 30 то 80 дирам боло рафтааст, ки ин ҳанӯз ҳадди ниҳоӣ нест.