М. УБАЙДУЛЛОЕВ МУШКИЛОТИ СОКИНОНРО ОСОН ГАРДОНД

           Душанбе, 30 сентябр.(АМИТ «Ховар», Марзия Саидова).-Раиси шаҳри Душанбе Маҳмадсаид Убайдуллоев беш аз 20 нафар сокинони пойтахтро, ки  муроҷиатҳояшон дар сатҳи муовинони  Раиси шаҳр ва раисони ноҳияҳо ҳалли худро наёфта буданд, ба ҳузур пазируфт.         Тибқи иттилои котиби матбуотии Раиси шаҳри Душанбе   Шавкат Саидов, мӯҳтавои асосии муроҷиати сокинонро дастрасӣ ба  манзили  истиқоматии иҷоравӣ ва қитъаи замин  барои сохтмони манзили истиқоматии индивидуалӣ ташкил медод, ки вобаста аз салоҳияти  шаҳрдорӣ нисбат ба ҳар кадомашон тадбирҳо андешида шуд.        Дар робита ба пешниҳоди манзили истиқоматии иҷоравӣ муқаррар гардид, ки минбаъд шаҳрдорӣ,  аз ҳисоби  фонди манзили коммуналӣ хонаҳои иҷоравиро танҳо барои  ниёзмандони  муассисаҳои  аз ҳисоби буҷети шаҳрӣ  ё ноҳиявӣ маблағгузоришаванда ҷудо менамояд. Тақсимоти он дар асоси  комиссияи марбутаи шаҳрӣ ҷараён мегирад.