МУЛОҚОТИ О.ОҚИЛОВ БО РАШОД КАЛДАНИ

Душанбе, 27 сентябр. (АМИТ «Ховар», Дилшодаи Ҷонмард).- 25 сентябри соли равон Сарвазири мамлакат Оқил Оқилов бо Ноиби Президенти корпоратсияи байналмиллалии молиявӣ Рашод Калдани мулоқот кард. Дар ҷараёни вохӯрӣ Сарвазири мамлакат Оқил Оқилов таъкид кард, ки аз ҷониби Корпоратсияи байналмиллалии молиявӣ сармоягузорӣ шудани 55 миллион доллари америкоӣ ба иқтисодиёти Тоҷикиистон дар зарфи 16 соли охир шаҳодат аз он медиҳад, ки дар раванди муносибатҳои Тоҷикистон ва Корпоратсияи байналмиллалии молиявӣ имконоту захираҳои мавҷуда барои ба сатҳи зарурӣ расонидани ҳамгироиҳо ҳануз ҳам ба пуррагӣ истифода нашудаанд . Рашод Калдани изҳор дошт, ки аснои сафари худ ба Тоҷикистон бо имконият ва роҳу воситаҳои фазои сармоягузории Тоҷикистон боз ҳам беҳтар шинос гардида барои дар оянда таҳким бахшидани муносибатҳои дуҷониба талош хоҳад кард. Дар мулоқот рушду тавсеаи равобити ҷонибҳо дар бахши иқтисодиёт, гидроэненргетика ва туризм зарур ва манфиатовар арзёбӣ гардида оид ба самтҳои дигари муносибатҳои Тоҷикистон ва Корпоратсияи байналмиллалии молиявӣ табодули афкори судманд сурат гирифт.