ОЗМУНИ «МУТАХАССИСИ БЕҲТАРИНИ СОЛ» ОҒОЗ ГАРДИД

Душанбе, 16 сентябр. (АМИТ «Ховар», Бекназари Абӯбакр). — Бахшида ба 20-солагии Истиқлолияти давлатии Ҷумҳурии Тоҷикистон, бо мақсади баланд бардоштани сатҳ ва эътибори касбҳое, ки ба рушди иқтисодиёт ва иҷтимоиёт мусоидат мекунанд, инчунин дарёфту ҷалби мутахассисони варзида, шахсони соҳибистеъдод ва ҳавасмандию қадршиносии онҳо қарори раиси вилояти Суғд Қоҳир Расулзода оид ба баргузории озмуни вилоятии «Мутахассиси беҳтарини сол» ба тасвиб расид. Озмуни мазкур бо ташаббуси раиси вилояти Суғд дар ҳамкорӣ бо ҳафтаномаи «Тоҷикистон» дар ҳудуди вилоят аз 1-уми сентябри соли 2010 то 1-уми сентябри соли 2011 гузаронида шуда, дар он намояндагони соҳаҳои мухталифи хоҷагии халқи вилоят ширкат меварзанд. Аз рӯи шартҳои озмун унвони «Мутахассиси беҳтарини сол» танҳо насиби онҳое мегардад, ки шаҳрванди Ҷумҳурии Тоҷикистон буда, дар ҳудуди вилоят ҷойи иқомати доимӣ доранд ва дар идораву муассисаҳои вилоятӣ, новобаста аз шакли моликият ва сохторашон фаъолият менамоянд. Дар пешбарии номзадҳо  мақомоти иҷроияи ҳокимияти давлатии шаҳру ноҳияҳо, корхонаву муассисаҳои ҳудуди вилоят ва тамоми шаҳрвандон ҳуқуқи ширкат варзиданро доранд. Инчунин, худпешбарӣ низ иҷозат дода шудааст. Мавриди зикр аст, ки озмун аз рӯи 20 номгӯи ихтисос, аз ҷумла бинокори сол, бонкири сол, варзишгари сол, духтури сол, донишҷӯи сол, кишоварзи сол, китобдори сол, милисаи сол, муаллими сол, олими сол, рӯзноманигори сол, соҳибкори сол ва амсоли инҳо гузаронида шуда, унвони «Мутахассиси беҳтарини сол» аз рӯи номгӯи касбият дар алоҳидагӣ муайян мегардад. Аз рӯи ҳар ихтисос 1 нафар ғолиб муайян карда шуда, бо мукофотҳои махсус – ҷоиза ва дипломи озмун, ифтихорномаи раиси вилояти Суғд ва мукофоти пулӣ дар ҳаҷми 1000 (ҳазор) сомонӣ сарфароз гардонида мешавад.