ПАЙВАНДҲОИ ҶАШНИ 20 – СОЛАГИИ ИСТИҚЛОЛИЯТ

         Душанбе, 22 сентябр. (АМИТ «Ховар», Лаззат Диловарзод).- Хоҷагии ҷангали Суғд 79 – сола шуд. Ҷангалпарварони вилоят ба муносибати иди касбии худ дар асоси «Барномаи рушди хоҷагии ҷангали Ҷумҳурии Тоҷикистон барои солҳои 2006 — 2015»  дар майдони 270 гектар ҷангалзори нав бунёд намуда, майдони 1753 гектар ҷангалзорҳои пешинаро хуб нигоҳубин намуданд,- иттилоъ доданд аз Хоҷагии ҷангал ва шикори вилоят ба мухбири АМИТ «Ховар».             Бино ба иттилои ҳамин манбаъ, ҷангалпарварон ба муносибати 20 – солагии Истиқлолияти давлатии Ҷумҳурии Тоҷикистон беш аз 100 ҳазор бех ниҳолҳои мевадиҳанда аз қабили: себ, нок, гелос, зардолу, чормағз, шафтолую анҷир ва ғайра, ки 20 номгӯйро ташкил медиҳанд, пайванд карданд.             Дар баробари ин, ҷангалпарварон   арчазору туғайзорҳоро      аз қонуншиканҳои экологӣ ҳифз намуданд.             Ҷангалпароварон ҳамчунин парвариши арчаи зарафшониро хуб ба роҳ монда, ҳамасола то 100 – 101 ҳазор бех кӯчати онро   парвариш ва ба фурӯш мебароранд.