А. САБЕР: «ТАҶРИБАИ ДУШАНБЕ ОМӮЗАНДА АСТ»

      Душанбе, 7 октябр.(АМИТ «Ховар», Марзия Сидова).-Масъалаи тақвияти муносибатҳои мутақобила оид ба ҳимояи ҳуқуқ ва ташкили шароити зарурӣ барои гурезаҳо зимни мулоқоти Раиси шаҳри Душанбе Маҳмадсаид Убайдуллоев бо роҳбари намояндагии Раёсати минтақавии Комиссари Олии Созмони Милали  Муттаҳид оид ба умури паноҳандагон дар Осиёи Марказӣ Азам Сабер дар Душанбе баррасӣ  гардид.         М. Убайдуллоев нақши сохтори бонуфузи СММ-ро дар суботи ҷомеаи тоҷикон ва ба эътидол овардани вазъи муноқишавии кишварҳои даргир нек арзёбӣ кард.          Мусоҳибон, ҳамзамон ба масъалаи баргузории ҷаласаи мизи мудаввари Комиссари Олии СММ дар умури паноҳандагон, ки дар мавзӯи «Проблемаҳои муҳоҷирати омехта дар Осиёи Марказӣ» нимаи аввали моҳи ноябр дар шаҳри Остона баргузор мешавад, дахл намуданд. Зикр шуд, ки интихоб ва баррасии мавзӯи мизи мудаввар ҷавобгӯи ниёзҳои ҷомеаи ҷаҳонӣ буда, он ба ҳалли проблемаҳои гурезагон, ки дар низоми ҳамзистии ҷаҳонӣ бар асари даргириҳо бе сарпаноҳ мондаанд, нақши муассир хоҳад гузошт.         Азам Сабер таъкид  кард, ки таҷрибаи шаҳри Душанбе дар ҳалли мушкилоти паноҳандагон миёни пойтахти  кишварҳои Осиё Марказӣ омӯзанда буда, он барои истифодаи дигар кишварҳои аъзои СММ мавриди пажӯҳиш қарор дода мешавад.