КИТОБИ ДЕРИНТИЗОРИ ХОНАНДАГОН ЧОП ШУД

Душанбе, 29 октябр. (АМИТ «Ховар», Ҳотам Рабиев).- Китоби устод Садриддин Айнӣ «Намунаи адабиёти тоҷик» тариқи нашриёти «Адиб» бо теъдоди 1000 нусха бори аввал бо хатти кириллӣ нашр гардид. Дар баргардониш  аз хатти форсӣ, дар таҳия ва тасҳеҳ саҳми олими варзида Мубашшири Акбарзод калон аст. «Намунаи адабиёти тоҷик» асарест, ки бо нашри он устод Айнӣ адабиёти тоҷикро ба оламиён муаррифӣ намуд. Ин асар дар таъсисёбии Ҷумҳурии Тоҷикистон нақши намоёне дошт. Ва имрӯз ҳам аҳамияти таърихии худро ҳифз кардааст. Китоби мазкур дар соли 1926 чун шиносномаи миллати тоҷик бар даҳони душманони миллат зарбаи сахт зада, дар худшиносии миллии тоҷикон нақши муассир гузошт. Китоби мазкур дар бораи ҳаёт ва фаъолияти зиёда аз 228 нафар шоиру нависандагон маълумоти зарурӣ додаст.