ТАДБИРҲО ҶИҲАТИ ИҶРОИ СУПОРИШҲОИ ПРЕЗИДЕНТ

     Душанбе, 26 октябр.(АМИТ «Ховар», Марзия Саидова).- «Кумитаи забон ва истилоҳоти назди Ҳукумати Ҷумҳурии Тоҷикистон ҷиҳати  иҷрои дастуру  супоришҳои Президенти ҷумҳурӣ Эмомалӣ Раҳмон, ки зимни  мулоқот ба муносибати  Рӯзи забони давлатии Ҷумҳурии Тоҷикистон  баён гардиданд, нақшаи чорабиниҳоро тарҳрезӣ кардааст», гуфт зимни нишасти матбуотӣ ба хабарнигорон Раиси Кумитаи истилоҳоти назди Ҳукумати ҷумҳурӣ Додихудо Саймуддинов.       Мавсуф зикр кард, ки татбиқи нақшаи чорабиниҳо ба рушди забони давлатӣ дар кишвар мусоидат менамояд. Бахусус, таҳияи Барномаи стратегияи  рушди забони давлатӣ  барои солҳои 2012-2016, татбиқи тадбирҳои муассир  барои ташаккули забони давлатӣ ҳамчун забони  илм ва рушди танзими истилоҳоти илмӣ, ҳифз ва барқарор намудани  номҳои таърихии ҷуғрофӣ,  андешидани татбиқи чораҳои  мушаххас барои беҳбудӣ бахшидани забони воситаҳои  ахбори омма, таъсис додани курсҳои омӯзиши забони  давлатӣ, таҳия ва нашри  китобҳои дарсӣ, фарҳангномаҳо, муҳовараҳои умумию соҳавӣ ҷиҳати омӯзиши забони тоҷикӣ барои ақаллиятҳои миллии Тоҷикистон аз ҳамин қабил аст.