ТАЪХИРИ ҶАМЪОВАРӢ ВА ТАСФИДАНИ БОЗОРИ ҲАННОТОН

Душанбе, 1 октябр. (АМИТ «Ховар», Лаззат Диловарзод).-Бино ба маълумоти фаврии Раёсати растанипарварии Вазорати кишоварзӣ тоин дам  ҳосили 3761 гектар замини картошка ҷамъоварӣ шудааст, ки ин нисбат ба ҳамин давраи соли 2009  516 гектар зиёд аст.    Тибқи дурнамои Вазорати кишоварзӣ, истеҳсоли картошка дар соли 2010  253 ҳазору 309 тонна пешбинӣ шудааст.    Хоҷагиҳои картошкапарварии ҷумҳурӣ то 27 –уми сентябри соли ҷорӣ ҳамагӣ 78 ҳазору 68 тонна картошка ҷамъоварӣ намудаанд, ки ин баробари 31 фоизи иҷрои нақшаи умумии картошка дар соли 2010 мебошад.     Рӯзҳои охир бо сабаби таъхир дар кандани картошка ва ворид намудани  он ба бозорҳои ҷумҳурӣ нархи картошка ҳар соат тағйир ёфта, рӯ  ба болоравӣ дорад.  Истифода аз вазъи баамаломада, ҳаннотону ҷаллобон нархро ба таври сунъӣ баланд мебардоранд. Мутасаддиёни бозорҳои шаҳр бошанд оид ба пешгирии ин амалҳои номатлуб кореро анҷом намедиҳанд. Ин беамалии мутасаддиён боиси овоза шудани ҳар гуна гапу калочаҳо миёни мардум гардида, боварӣ нисбат ба роҳбарону мутасаддиёни соҳаи савдо рӯз то рӯз аз ҷониби шаҳрвандон коста мегардад.