ТАЪСИСИ КУРСИ ОМӮЗИШИ АЛИФБОИ НИЁГОН

         Душанбе, 1 октябр. (АМИТ «Ховар», Назокат Қодирова). – Имрӯз дар дафтари Анҷумани тоҷикон ва форсизабонони ҷаҳон «Пайванд», дар Кохи Вахдати пойтахт бахшида ба иди Забон чорабинии фарҳангӣ доир гардид. Дар ин чорабинӣ зикр гардид, ки бо ташаббуси Анчумани мазкур дар ҷумҳурӣ курси семоҳаи омӯзиши алифбои ниёгон ташкил карда шуд. Дар ин чорабинӣ асосан донишҷӯён ширкат варзиданд.             Бояд гуфт, ки ташкили чунин курсҳои омӯзишӣ минбаъд низ давом хоҳад ёфт. Дар назар дошта шудааст, ки дар оянда курси омӯзиши забони англисӣ, ҳофизшиносӣ, шоҳномахонӣ ва омӯзиши санъатҳои шеърӣ ташкил шавад.             Дар чорабинии мазкур раиси Кумитаи иҷроияи «Пайванд» Исомиддин Салоҳиддинов, Ройзани фарҳангии Ҷумҳурии Исломии Эрон дар Тоҷикистон Амирҳусайни Ардуш, масъули бахши ройзании фарҳангии Эрон Ғазанфарӣ, устоди алифбои форсӣ, шоир ва пажӯҳишгари эронӣ Муҳаммадризо Тоҷиддинӣ иштирок намуданд. Мақсад аз ташкили ин чорабинӣ дар ҷумҳурӣ равнақи тоза бахшидан ба омӯзиши хат ва алифбои ниёгон мебошад.