ТО НОЯБР БА ХОНАҲОИ НАВ МЕКӮЧАНД

Душанбе, 7 октябр. (АМИТ «Ховар», Лаззат Диловарзод).- Фақат чанд хонаи нотамом мондааст, ки то моҳи ноябр сохта ба соҳибонашон супорида мешаванд,-иттилоъ доданд аз маркази матбуоти раиси шаҳри Кӯлоб ба мухбири АМИТ «Ховар».  Дар ҳолате, ки сохтмони хонаҳои истиқоматӣ дар шаҳраки навбунёд барои зарардидагони маҳаллаи  Чармгарони шаҳри Кӯлоб аз офати табиӣ идома дорад, ҳафтаи гузашта аз ҷониби давлати Ҳиндустон тавассути намояндагони дипломатии ин кишвар дар Ҷумҳурии Тоҷикистон, ба Ҳукумати ҷумҳурӣ 200 ҳазор доллар барои зарардидагони шаҳри Кӯлоб супорида шуд.  Ба иттилои ҳамин манбаъ, моҳи ноябр охирин оилаҳои зарардидаи маҳаллаи Чармгарон бо хонаҳои нави замонавӣ, ки бо тамоми асбобу анҷоми рӯзгор ҷиҳозонида мешаванд, таъмин хоҳанд шуд.