ЗАХИРАИ СӮЗИШВОРӢ КОФИСТ

Душанбе, 29 октябр. (АМИТ «Ховар», Назокат Қодирова).-  Роҳбарони муассисаю ташкилот ва мактабҳои ноҳияи Рашт барои давраи тирамоҳу зимистони соли ҷорӣ омодагии ҳамаҷониба мебинанд. Бо мақсади харидани сӯзишворӣ барои муассисаҳои мазкур аз ҷониби мақомоти иҷроияи ҳокимияти давлатии ноҳия қариб 400 ҳазор сомонӣ маблағ ҷудо гардидааст. Бо ин маблағ барои ташкилоту муассиса ва мактабҳо 558 метри мукааб ҳезум ва 240 тонна ангишт харид шуда, захира гаштааст. Ғайр аз ин ба таври илова чандин генератори барқӣ низ омодаи коранд. Тавре аз шӯъбаи маорифи ноҳия хабар доданд, мактабҳо пурра бо ангишту ҳезум таъминанд. То ин муддат мактабҳои деҳоти дурдаст, бунгоҳҳои тиббӣ ва омӯзишгоҳи омӯзгорӣ низ ба зимистони дар пеш истода омода гаштаанд. Бояд таъкид намуд, ки омодагии ҳамаҷонибаи мактабҳо ба зимистон ба пешрафти таълиму тарбияи толибилмон мусоидат менамояд.