БАРРАСИИ МАСОИЛИ НАШЪАМАНДӢ ДАР ФОРУМ

Душанбе, 18 ноябр. (АМИТ «Ховар», Дилшодаи Ҷонмард).-Дар доираи ҳамкориҳо бо Ҷамъияти Олмонӣ оид ба ҳамкориҳои техникӣ (GTZ) аз моҳи октябри соли 2010 дар Ҷумҳурии Тоҷикистон татбиқи Барномаи минтақавии «Пешгирии ВНМО/БПНМ ва нашъамандӣ миёни ҷавонони Тоҷикистон» оғоз гардидааст. Бо ташаббуси Вазорати кор бо ҷавонони Ҷумҳурии Қирғизистон ва Барномаи «Тандурустӣ дар Осиёи Марказӣ»-и Ҷамъияти Олмонӣ оид ба ҳамкориҳои техникӣ аз 9 то 12 ноябри соли 2010 дар соҳили Иссиқкўли Ҷумҳурии Қирғизистон Форуми байналмилалии ҷавонон зери унвони «Пешгирии ВНМО/ БПНМ ва нашъмандӣ миёни ҷавонон: даъват ва имкониятҳо» баргузор гардид. Дар Форуми мазкур намояндагони 5 кишвари Осиёи Марказӣ: Қирғизистон, Қазоқистон, Ӯзбекистон, Озарбойҷон ва Тоҷикистон иштирок намуданд. Ҳамчунин, 28 нафар намояндагони ҷавони мамлакат,  аз сохторҳои давлатӣ ва ташкилотҳои ҷамъиятии ҷавонон иштирок намуданд.  Дар асоси барномаи таҳррезигардида дар доираи Форуми ҷавонон ҷаласаи пленарӣ (бо иштироки Вазири кор бо ҷавонони Ҷумҳурии Қирғизистон), машваратҳо, муаррифии фаъолияти мақомоти кор бо ҷавонони давлатҳои иштироккунанда дар самти пешгирии ВНМО/БПНМ ва нашъамандӣ, ток-шоу, бар-кэмп барои ҳамоҳангсозии сиёсат дар самти пешгирии ВНМО/БПНМ ва нашъамандӣ миёни ҷавонон баргузор гардид. Дар рафти Форум ҳайати намояндагони Тоҷикистон дастовардҳои худро дар самти пешгирӣ ва мубориза алайҳи маводи нашъадор ва ВНМО/БПНМ муаррифи намуданд. Инчунин, ҳангоми боздид иштирокчиён бо роҳу усулҳои замонавӣ, ки баҳри пешгирии бемории ВНМО/БПНМ ва нашъамандӣ истифода бурда мешаванд, ошноӣ пайдо карданд. Ҳамзамон, дар доираи Форум 12 ноябр мулоқоти муовини Раиси Кумита Муинова М.М. бо Роҳбари Барномаи минтақавии «Пешгирии ВНМО/БПНМ ва нашъамандӣ миёни ҷавонони Тоҷикистон» Гизел Хайфа баргузор гардид. Дар доираи мулоқот масъалаҳои марбут ба таъсис ва рушди Марказҳои имконоти ҷавонон дар шаҳрҳои Душанбе, Қӯрғонтеппа ва Хоруғ оид ба ташаккули тарзи ҳаёти солими ҷавонон баррасӣ гардид. Дар маҳфили фарҳангии Форум намояндагони ҷавонони мамлакат тавонистанд дастовардҳои хешро ба намоиш гузошта, таъриху тамаддуни бойи кишвар ва анъанаҳои аҷдодиро муаррифӣ намоянд. Дар анҷоми чорабинии мазкур аз ҷониби иштирокдорон баргузории ҳамасолаи Форуми байналмилалии ҷавонон дар кишварҳои иштирокчӣ пешниҳод гардид. Бояд иброз намуд, ки маълумоти дар доираи Форум гирифташуда, барои татбиқи босамари барномаи минтақавии «Пешгирии ВНМО/БПНМ ва нашъамандӣ миёни ҷавонони Тоҷикистон» заминаи боэътимод хоҳад гузошт. Дар ин бора аз бахши иттилоотию таҳлилии Кумитаи ҷавонон, варзиш ва сайёҳии назди Ҳукумати  Ҷумҳурии Тоҷикистон ба мо иттилоъ доданд.