МАРКАЗИ ХУДШИНОСИИ БОНУВОН ИФТИТОҲ ШУД

 Душанбе, 30 ноябр.(АМИТ «Ховар», Марзия Саидова).- Нахустин «Маркази худшиносии бонувон»  30 ноябр дар шаҳри Душанбе ба таври расмӣ ба фаъолият шурӯъ кард, ки дар маросими ифтитоҳи он Раиси шаҳр Маҳмадсаид Убайдуллоев иштирок намуд.       Раиси шаҳр ба фаъолият шурӯъ кардани маркази мазкурро ба бонувон шодбош гуфта, онро навгонӣ дар фазои иҷтимоии пойтахт арзёбӣ кард. Зикр шуд, ки Марказ бо ҷалби васеи бонувони касбу кори гуногуни  аз иҷрои вазифаҳои таъинотиаш баромада,  ҳамкории ногусастанӣ ва анҷоми пажӯҳишҳои мустақилу мақсаднок дар ҷомеа баҳри ташаккули зеҳниву ақлонӣ, дарёфту тарбияи бонувони соҳибистеъдоди роҳбар ва пешниҳоди онҳо ба иҷрои вазифаҳои хизмати давлатӣ дар  сохторҳои шаҳрӣ нақши муассир хоҳад гузошт. Муассисаи мазкур бо қарори Раиси шаҳри Душанбе  баҳри татбиқи Қарори Ҳукумати Ҷумҳурии Тоҷикистон «Дар бораи Барномаи давлатии « Самтҳои асосии сиёсати давлатӣ оид ба таъмини ҳуқуқу имкониятҳои баробари мардон ва занон дар Ҷумҳурии Тоҷикистон барои солҳои 2001- 2010» ташкил ёфтааст. Марказ аз ҳисоби буҷаи шаҳр маблағгузорӣ мешавад.           Марказ дар ошёнаи чоруми КВД «Маркази равобити пойтахт» ҷойгир буда, сарвари он Шаҳло Ҷӯраева, ки аз рӯи ихтисос ҳуқуқшинос — равоншинос аст,  таъин гардидааст.