МУЛОҚОТИ САФИРИ ТОҶИКИСТОН БО МУОВИНИ АВВАЛИ ВАЗИРИ КОРҲОИ ХОРИҶИИ ПОКИСТОН

Душанбе, 24 ноябр. (АМИТ «Ховар», Пайрав Назаров).- 23 ноябри соли 2010 сафири фавқулода ва мухтори  Ҷумҳурии Тоҷикистон Зубайдулло Зубайдов бо муовини аввали вазири корҳои хориҷии Ҷумҳурии Исломии Покистон Салмон Башир мулоқот доир намуд. Дар вохўрӣ масъалаҳои марбут ба муносибатҳои дуҷониба ва сеҷониба (Тоҷикистон, Покистон ва Афғонистон) дар марҳилаи кунунӣ мавриди баррасӣ қарор гирифтанд. Муҳокимаи масъалаҳои вобаста ба сафари расмии қарибулвуқўи Президенти Ҷумҳурии Тоҷикистон Эмомалӣ Раҳмон ба Покистон ва омодагӣ ба он яке аз мавзўъҳои асосии мулоқот буд. Ҷонибҳо роҷеъ ба ҷаласаи навбатии сарони ҳукуматҳои давлатҳои аъзои Созмони ҳамкориҳои Шанхай дар Душанбе табодули назар намуда, сафари ҳайъати баландпояи Покистонро таҳти роҳбарии Сарвазир Сайид Юсуф Ризо Гелонӣ ба Тоҷикистон чун исботи возеҳи кўшишҳо барои боз ҳам таҳкиму тавсеа бахшидани ҳамкориҳои ду давлати дўст арзёбӣ намуданд. Зимни сўҳбат Салмон Башир иброз дошт, ки Покистон барои амалӣ шудани лоиҳаи КАСА-1000, ки барои ин кишвар аҳамияти хосаи ҳаётӣ дорад, кӯшишҳои муассирро ба харҷ хоҳад дод. Сафир қаноатмандии ҷониби Тоҷикистонро аз бозгашти муҳассилини ғайрирасмии шаҳрвандони кишвараш аз Покистон қайд намуда, иброз дошт, ки ҳамкорӣ дар ин самт минбаъд низ идома хоҳад ёфт. Дар ин росто, табодули сафарҳои донишҷӯён, аҳли илму адаб ва вакилони парлумони ҳарду кишвар хеле самаранок хоҳад буд.