РӮЗҲОИ ФАРҲАНГИИ ҶАВОНОНИ ХАТЛОН ДАР СУҒД

Душанбе, 11 ноябр. (АМИТ «Ховар», Покиза Маҳмадбекова). –Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон бо мақсади ботантана ҷашн гирифтани рӯзи Сарқонуни Ҷумҳурии Тоҷикистон ва Рӯзи парчами давлатии ҶТ, Рӯзҳои фарҳангии ҷавонони Вилояти Хатлонро аз 9 то 11 ноябри соли ҷорӣ дар шаҳри Исфараи вилояти Суғд баргузор намуд. Тавре дар сӯҳбат ба мухбири АМИТ «Ховар» мудири бахши иттилоотию таҳлилии кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Ҷамолиддин Нуров иттилоъ дод, дар доираи баргузории ин чорабинӣ ҷавонони вилояти Хатлон аз намоишгоҳи ҳунарҳои мардумӣ, ёдгориҳои таърихиву фарҳангӣ ва Маркази ҷавонони ҷамоати Чоркӯҳи шаҳри Исфара боздид намуданд.  Инчунин, дар ин сафар ҷавонон бо таърихи ин шаҳри куҳанбунёди тоҷикон ва тараққиёту пешравии он дар даврони истиқлолият ошноӣ пайдо намуда, аз ёдгориҳои таърихии ҷамоати Чоркӯҳ, Мадрасаи Ҳазрати Шоҳ ва Лангари моҳиён дидан намуданд. Дар назар аст, ки рӯзҳои наздик таҷлили Рӯзҳои фарҳангии ҷавонони вилояти Суғд дар ноҳияи Рашт ва таҷлили Рӯзҳои фарҳангии ҷавонони ноҳияҳои тобеи ҷумҳурӣ дар вилояти Хатлон   баргузор хоҳад шуд.